Tədrisin idarə edilməsi, elektron dərsliklərin hazırlanması və test sistemi e-tədris sahəsində əsas anlayışlardır.  

Bu barədə məlumatı institutun 10 saylı şöbəsinin əməkdaşı Təranə Məcidova növbəti şöbə seminarında çıxışı zamanı məlumat verib. “Elektron təhsildə beynəlxalq standartların araşdırılması” adlı məruzə ilə çıxış edən T.Məcidova e-təhsilin üstünlüklərindən söz açıb. Bildirib ki, e-təhsil vasitəsilə tələbələr lazımi bilikləri onlar üçün münasib vaxtda, əsas fəaliyyətdən ayrılmadan əldə etmək imkanına malikdirlər. Bu üsul müəllimlərə tədris müəssisələrinə getmədən tapşırıqlar verməyə və bilikləri qiymətləndirməyə imkan yaradır.

E-təhsil  standartlarının yaradılmasının həyat dövrü haqqında məlumat verən məruzəçi onun tədqiqetmə və nəşr, tətbiqlərdə reallaşdırma və təcrübənin aparılması, təkmilləşdirmə və s. mərhələlərdən ibarət olduğunu bildirib.  Həmçinin e-tədris üçün nəzərdə tutulmuş AICC, IMS Global Learning Consortium, SCORM (Sharable Content Object Reference Model) standartlar və spesifikasiyalar haqqında məlumat verib.

“Tədrisin İdarəetmə Sistemi (Learning Management System - LMS)  elektron tədrisin proqram təminatını təşkil edir”, – deyə bildirən T.Məcidova vurğulayıb ki, proqram təminatı tələbələrin qeydiyyatı və səlahiyyətləri, tədris obyektləri və tədris prosesinin idarə olunması kimi funksiyaları yerinə yetirir.

Məruzəçi elektron təhsil standartlarına qoyulan tələblər haqqında da məlumat verib. Bildirib ki, buraya qarşılıqlı əlaqələr, dəfələrlə istifadə imkanı, davamlılıq, adaptivlik, əlyetərlik və s. aiddir.

T.Məcidova, həmçinin elektron tədris mühitinin və SCORM standartının konseptual modeli, SCORM-un texniki kitabları - spesifikasiya və standartlar toplusu haqqında məlumatları diqqətə çatdırıb.

Məruzə ətrafında müzakirələr aparılıb, rəy və təkliflər səsləndirilib.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.