Massaçussets Texnologiya İnstitutunun İnformasiya texnologiyaları və süni intellekt laboratoriyasının tədqiqatçılar qrupu radio dalğalarının köməyilə insanın emosional vəziyyətini yüksək dəqiqliklə müəyyən etməyə imkan verən qurğu hazırlayıblar.

hitech.newsru.com saytının məlumatına görə,“EQ-Radio” adlı sistem ürək döyüntüsü və insanın nəbzi haqqında məlumatlar əsasında emosiyaları tanıyır. Gələcəkdə belə texnologiyanın tətbiqi adi Wi-Fi router-in köməyilə emosiyaları müəyyən etməyə imkan verəcək. Hələ ki, bunun üçün tədqiqatçılar tərəfindən hazırlanmış radar istifadə olunur.

Sınaqların nəticələrinə əsasən, alqoritm radio dalğalarının köməyilə dörd emosiyanı tanımağı öyrənib: sevinc, həzz, qəm və qəzəb. Proqram sınaqda iştirak edənlərin emosiyalarını 87 faiz, kənar insanların emosiyalarını isə 72.3 faiz dəqiqliklə müəyyən edib.

İstehsalçıların bildirdiyinə görə, “EQ-Radio” sistemi “ağıllı” evin qurğuları ilə inteqrasiya oluna bilər.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.