“IHS” analitik şirkətinin hesabatına əsasən, dünyada internetə qoşulan qurğuların (smartfon, planşet, fərdi kompüter, televizor, TV və audio qurğular) sayı 8,1 milyard təşkil edib. Bu göstəriciləri nəzərə alan ekspertlərin hesablamalarına görə, dünyada hər evə orta hesabla dörd internetə qoşulmuş qurğu düşür.

Hesabatda qeyd olunur ki, smartfonlar sayəsində internetə qoşulan qurğular bazarına hər il təxminən yarım milyard yeni qurğu əlavə olunur. Həmçinin planşet və TV qurğularının sayında artım olsa da, ən yüksək artım smartfonlarda müşahidə olunur.

Analitiklərin qiymətləndirməsinə əsasən, 2016-cı ildə smartfonların satış həcmi 7 faiz artaraq 1,5 milyarda çatacaq.

Müqayisə üçün qeyd edək ki, smartfon sahəsində ən yüksək artım göstəricisi artımın 73 faizə bərabər olduğu 2010-cu ildə qeydə alınıb. 2015-ci ildə artım 14,4 faiz təşkil edib.

2020-ci ildə bazarın həcminin 1,9 milyard qurğuya çatacağı gözlənilir.

DailyComm.ru