ABŞ-ın Massaçusets Texnoloji İnstitutunun Süni İntellekt və Kompüter Texnikası Laboratoriyasının tədqiqatçıları silikon materialdan manipulyator hazırlayıblar. Robotlar manipulyatorun köməyilə obyektlərin formasını müəyyənləşdirəcəklər.

gazeta.ru saytının məlumatına görə, qurğu müxtəlif forma və möhkəmliyə malik əşyaların götürülməsi zamanı obyektin səthinin bərkliyini və əyriliyini müəyyənləşdirən xüsusi datçiklərlə təchiz edilib. Alqoritm robotun barmaqlarının düzülüşü barədə məlumatı və datçiklərdən əldə olunan göstəriciləri məlumat bazası ilə müqayisə etməklə robotun əlində hansı obyekti tutduğunu təyin edir. Robot qarşısındakı obyektin xüsusiyyətlərini bildikdən sonra müəyyən güc sərf edərək onu götürür.

Sistem formaca bir-birinə oxşar əşyaları da effektiv şəkildə ayırd edir. Yumşaq robot barmaqlarından istifadə isə CD disk və ya kağız kimi mürəkkəb obyektləri götürməyə imkan verir.