Avropa İttifaqı tərəfindən maliyyələşdirilən tədqiqatçılar qrupu təsviri dartaraq ekrandan kənara çıxarmağa imkan verən yeni texnologiya hazırlayıb.

Formasını dəyişən ekran “GHOST” (Generic, Highly-Organic Shape-Changing Interfaces) adlı layihənin bir hissəsidir. Bu istiqamətdə tədqiqatların aparılmasına və yeni texnologiyanın hazırlanmasına 3 il vaxt sərf olunub. Layihənin icrasında Kopenhagen, Bristol, Lankaster və Eyndhoven universitetləri iştirak edib.

hi-news.ru saytının məlumatına görə, yeni ekranın istehsalında şüşə əvəzinə elastik sintetik material olan laykradan istifadə olunub. Elastik ekrandakı təsvirə barmaqla toxunmaq və onu çəkərək ekrandan kənara çıxarmaq ultrasəs levitasiya texnologiyası sayəsində mümkündür.

Tədqiqatçıların fikrincə, yeni texnologiya bir çox sahələrdə tətbiq olunacaq.

Formasını dəyişə bilən ekranların 5 ildən sonra satışa çıxarılacağı bildirilib. Hazırda alimlər bu texnologiyanın smartfonlarda reallaşdırılması üzərində işləyir.