AMEA Rəyasət Heyətinin qərarı ilə 2015-ci ildə akademiyada keçiriləcək beynəlxalq və respublika səviyyəli elmi tədbirlər planı təsdiq olunub.

Planda 2015-ci il üçün AMEA-da 9 beynəlxalq və 25 respublika səviyyəli tədbirin keçirilməsi nəzərdə tutulur. Bu tədbirlərdən biri də “İnformasiya təhlükəsizliyinin multidistiplinar problemləri” mövzusunda  respublika elmi-praktiki konfransıdır. Konfrans AMEA İnformasiya Texnologiyaları İnstitutunun təşkilatçılığı ilə cari ilin 17-18 may tarixlərində Bakı şəhərində keçiriləcək.
 
Elmi-praktiki konfrans 17 may - İnformasiya cəmiyyəti gününə həsr olunur. Artıq ənənə halını alan bu tədbirdə dövlət qurumları, qeyri-hökumət təşkilatlarının nümayəndələri, İT mütəxəssisləri və bu sahədə fəaliyyət göstərən digər şəxslərin iştirakı gözlənilir.
 
Konfrans informasiya təhlükəsizliyi problemləri istiqamətində bilik və təcrübə mübadiləsinin aparılması, bu sahədə beynəlxalq aləmdə aparılan elmi-tədqiqatlarla tanışlıq və Azərbaycan alimlərinin diqqətini bu sahəyə yönəltmək baxımından mühüm əhəmiyyətə malikdir.
 
Tədbirdə informasiya təhlükəsizliyinin multidistiplinar problemlərinin müzakirəsi, əldə olunan nəticələrin ölkə ictimaiyyətinə çatdırılması nəzərdə tutulur.

© Bütün hüquqlar qorunur. Xəbərlərdən istifadə edərkən www.ict.az saytına istinad zəruridir.