Bu gün üçölçülü çap son illərin əsas texnoloji tendensiyalarından biri kimi nəzərdən keçirilir. Bu texnologiya müxtəlif fəaliyyət sahələrində - incəsənət, kulinariya və memarlıqdan tutmuş tibb, elm və təhsil sahələrinədək inqilab etməyə qadirdir. 

Fransada üçölçülü çap texnologiyalarına həsr olunmuş ilk sərgi keçiriləcək. 17-20 iyun 2014-cü il tarixlərdə Lion şəhərində baş tutacaq 3D Print 2014 – I Beynəlxalq 3D-printerləri sərgisinin təşkilatçısı IDICE SAS şirkətidir. 

“Eurexpo” mərkəzində keçiriləcək sərgidə 3D vizuallaşdırma, proqram təminatı, üçölçülü obyektlərin istehsalı üçün materiallar və xidmətlər və s. ilə bağlı əldə olunmuş innovasiyalar nümayiş etdiriləcək. 

expoclub.ru beynəlxalq sərgi portalının məlumatına görə, 3D Print 2014 əsasən qrafika, kağız, çap və reproqrafiya (informasiyanın faksimil, yəni qeyri-poliqrafik üsulla surətinin çıxarılması) sektorlarına aksent edəcək.