25-28 sentyabr 2017-ci il tarixlərində Koreyanın Busan şəhərində “ITU Telecom World 2017” – Ümundünya İKT forumu keçiriləcək.

“ITU Telecom World” qlobal İKT cəmiyyəti üçün mühüm hadisə və unikal tədbirdir. Burada dünyanın informasiya-kommunikasiya texnologiyalarının gələcəyi müzakirə olunur. BMT-nin İKT məsələləri üzrə ixtisaslaşdırılmış müəssisəsi olan Beynəlxalq Telekommunikasiya İttifaqı (International Telecommunication Union - ITU) tərəfindən təşkil edilən Ümumdünya İKT forumu müxtəlif ölkələrin dövlət və özəl sektorlarının yüksəkvəzifəli nümayəndələrindən ibarət olan auditoriyanı bir araya toplayır.

telecomworld.itu.int saytının məlumatına görə, “ITU Telecom”un proqramına “ağıllı” şəhərlər, 5G, Əşyaların İnterneti, süni intellekt və digər sahələrə aid ən yeni texnologiyaların təqdim olunacağı sərgi də daxildir. Tədbirin əsas hissəsi olan forumda isə, rəqəmsal iqtisadiyyatın sonrakı inkişafına səbəb olan texnologiyalar, siyasət və strategiyalara həsr edilmiş yüksək səviyyəli müzakirələr aparılacaq.

Tədbirin ən əhəmiyyətli hissələrindən biri də “ITU Telecom”un mükafatlarının təqdimatı olacaq. Bu mükafatlar İKT-də innovasiyaların və mühüm nailiyyətlərin tanınmasını bildirən simvol kimi təqdim olunur.

© Bütün hüquqlar qorunur. Xəbərlərdən istifadə edərkən www.iсt.az saytına istinad zəruridir.